Psa 37 | NdeIBE | STEP | ElikaDavida. Ungazikhathazi ngabantu ababi loba uhawukele labo abenza okungalunganga;

Psalms 37

1 Ungazikhathazi ngabantu ababi loba uhawukele labo abenza okungalunganga;

2 ngokuba bazabuna masinyane njengotshani, njengezimila eziluhlaza bazakufa masinyane.

3 Themba kuJehova wenze okulungileyo; hlala elizweni ukholise amadlelo amahle.

4 Zithokozise kuJehova yena uzakupha izifiso zenhliziyo yakho.

5 Nikela ukuphila kwakho kuJehova; themba kuye, yena uzakwenzela lokhu:

6 Uzakwenza ukulunga kwakho kukhazimule njengentathakusa, ubuqotho balokho okulwelayo njengelanga leminʼenkulu.

7 Chuma phambi kukaJehova umlindele ngesineke; ungakhathazeki nxa abantu bephumelela ngezindlela zabo, nxa bephutshisa amaqhinga abo amabi.

8 Xwayana lokuzonda njalo ufulathele intukuthelo; ungakhathazeki, kukhokhelela ebubini kuphela.

9 Ngokuba abantu ababi bazasuswa, kodwa labo abathemba uJehova bazakudla ilifa lelizwe.

10 Kuseyisikhatshana nje, ababi bazabe bengasekho; loba usubadinga kabasayikufunyanwa.

11 Kodwa abathobekileyo bazakudla ilifa lelizwe bakholise ukuthula okukhulu.

12 Ababi baceba ukulimaza abalungileyo babagedlele amazinyo;

13 kodwa uJehova uyabahleka ababi, ngokuba uyazi ukuthi usuku lwabo luyeza.

14 Ababi bakhokha inkemba, banweba idandila ukulimaza abahluphekayo labaswelayo, ukubulala labo abandlela zabo ziqotho.

15 Kodwa izinkemba zabo zizagwaza ezabo izinhliziyo, lamadandila abo azakwephulwa.

16 Kungcono ingcosana leyo abalayo abalungileyo kulenotho yababi abanengi;

17 ngokuba amandla ababi azaqedwa, kodwa uJehova uyabaxhasa abalungileyo.

18 Izinsuku zabangelasici ziyaziwa nguJehova, ilifa labo lizakuma lanini.

19 Ngezikhathi zomonakalo abayikubuna; ngezikhathi zendlala bazasutha.

20 Kodwa ababi bazabhubha; izitha zikaJehova zizakhanya zizinhle njengobuhle beganga, zizanyamalala – zinyamalale njengentuthu.

21 Ababi bayeboleka kodwa kababuyisi, kodwa abalungileyo bayapha kakhulu;

22 labo uJehova ababusisayo bazakudla ilifa lezwe; kodwa labo abethukayo bazasuswa.

23 Nxa uJehova ethokoziswa yikuhamba komuntu, uyaqinisa izinyathelo zakhe;

24 loba angakhubeka, kayikuwa, ngokuba uJehova uyamsekela ngesandla sakhe.

25 Ngangimutsha, manje sengiluphele, kodwa angizange ngibone abalungileyo bedelwa loba abantwababo becela isinkwa.

26 Bayaphana kokuphela njalo bayebolekana nje; abantwababo bazabusiswa.

27 Phendukani ebubini lenze ukulunga; lapho-ke lizahlala elizweni nini lanini.

28 Ngokuba uJehova uthanda abalungileyo njalo kayikubadela abathembekileyo bakhe. Bazavikelwa kuze kube nini lanini kodwa inzalo yababi izalahlwa;

29 abalungileyo bazazuza ilifa lelizwe bahlale kulo lanini.

30 Umlomo womuntu olungileyo ukhuluma ukuhlakanipha, lolimi lwakhe lukhuluma okuqondileyo.

31 Umthetho kaNkulunkulu wakhe usenhliziyweni yakhe; izinyawo zakhe kazitsheleli.

32 Ababi bacathamela abalungileyo befuna impilo yabo qobo lwayo;

33 kodwa uJehova kayikubayekela bazenzele abakuthandayo kubo kumbe balahlwe licala nxa bethonisiswa.

34 Lindelani uJehova ligcine indlela yakhe. Uzaliphakamisa lilithathe ilifa lelizwe; lizakubona lokhu nxa ababi sebesusiwe.

35 Sengike ngabona umuntu omubi olesihluku ehluma njengesihlahla esikhula kuhle emhlabathini waso wemvelo,

36 kodwa waphanga wafa kabe esabakhona; ngathi loba sengimdinga ngamswela.

37 Nanzelela abangelecala, qaphela abaqotho. Likhona ikusasa kumuntu wokuthula.

38 Kodwa zonke izoni zizabhujiswa; ikusasa lezigangi lizasuswa.

39 Ukusindiswa kwabalungileyo kuvela kuJehova; uyinqaba yabo ngesikhathi sokuhlupheka.

40 UJehova uyabasiza abakhulule; abakhulule kwababi abasindise, ngokuba baphephela kuye.